hiugakitchen.: 馬鈴薯千層派

每個星期最期待嘅就係weekend嘅晚上可以煮晚餐，

每次maindish都好容易決定，食雞牛豬肉蝦蟹...

但去到side dish嘅時候就諗到頭都大埋。

所以我有張黃牌。

每次諗唔到，屋企人又無意見嘅時候我就會整哩個馬鈴薯千層派。

芝士加cream 拎去焗又簡單又好食，實無死

材料

2個薯仔

1隻雞蛋

200ml 牛奶+忌廉 (我用嘅比例係1:1)

2湯匙蒜蓉

一湯匙牛油

4片片裝芝士

適量鹽+胡椒

適量雜錦香草

先處理薯仔，批皮，

用任何方法將佢切成薄片，

我用咗批皮刨批到佢每片差唔多厚。

注意，越薄越容易熟，吸得越多汁！

於小鍋裡，用牛油慢慢將蒜蓉煮香，

加入牛奶和忌廉，以慢火煮至微滾。

注意睇火，滾瀉污糟晒就麻煩了。

以鹽胡椒雜錦香草調味，

記得唔好落太多鹽，因為芝士已經有咸味了。

加入片裝芝士，閒置2分鐘用餘溫整溶啲芝士。

最後加入雞蛋拌勻。

於焗盤內一層薯片一層醬汁，

一層薯片一層醬汁，

一層薯片一層醬汁.......

記得時不時用手掌壓實佢，

咁焗出嚟就會dense啲。

準備好後，
可以到食之前40分鐘先放入180焗爐。
不過如果你嘅薯片切得唔夠薄可能要再焗耐啲。

* 如果焗到一半面層已經金黃色，
可用錫紙覆蓋，繼續焗，費事燶。

xxxx

hiugakitchen.