Raspberry Panna cotta － 覆盆子意大利奶凍

餐廳成日用panna cotta做甜品，

因為佢夠簡單，夠light

加上士多啤梨或紅莓醬，少少酸，

更加可以解膩。

其實做法同材料都好簡單，

如果係做細細杯嘅雪係冰箱九個字就食得。

事先準備好擺係雪櫃又得。

尋晚食完龍蝦尾同fish pie後突然想食啲light啲嘅甜嘢，

打開雪櫃見到用剩嘅cream 同太酸好難食嘅raspberries，

即刻想食panna cotta。

材料

奶凍食譜:

忌廉(如果唔想全忌廉咁肥  可以半忌廉半牛奶)

魚膠片

糖

雲尼拿油

份量我就用比例代替啦，

忌廉同魚膠片嘅比例係 75g:1g

忌廉同糖嘅比例係 10g:1g

覆盆子糖漿食譜:

Raspberries

糖 (視乎你嘅生果有幾甜，自己酌量加)

一湯匙  白酒

半湯匙  檸檬酒(自己用vodka同檸檬皮浸嘅，亦可用檸檬皮代替)

先將魚膠片用溫水浸軟，約5分鐘。

忌廉  糖  雲尼拿油 用中火煮至糖溶掉 忌廉微滾。

將已浸軟嘅魚膠片放入忌廉，

靜待兩分鐘後拌勻，至完全溶解。

過篩隔走啲立雜嘢，倒入容器。

如果要快嘅可以放入冰格 若45分鐘，

如果唔係chill架要大概2-3個鐘。

(放咗落冰格記得拎返出嚟唔係會爆炸)

至於覆盆子糖漿基本上係將所有材料用慢火煑，

用羹背壓爛Raspberries，

煮到杰杰地就ok啦。

xxx

Fish Pie - 魚批

爸爸不嬲對英國菜情有獨鍾，
講左成個禮拜話想食FISH PIE
今日終於有機會整喇

FISH PIE 顧名思義就係魚整嘅pie
材料好簡單，基本上咩魚都得嘅，
最主要係無骨，
傳統通常係用白魚 例如 鱈魚(cod), 比目魚 (halibut)
亦可以加其他海鮮例如青口肉，帶子等等
今次我就用咗三文魚 比目魚  帶子  蝦

加上white sauce 同薯蓉  正。
不得不提，今次嘅薯蓉用咗brown butter，
更香更intense


材料

薯蓉材料:
薯仔
牛油
牛奶
鹽 胡椒粉

餡料材料:
三文魚柳
比目魚柳
雪藏帶子
雪藏蝦
鹽 胡椒粉
白酒

白汁材料:
洋蔥
牛油
麵粉
牛奶
鹽 胡椒粉
意式香草
dill



先將魚柳解凍洗淨  切成大約2.5cm 嘅cube，
帶子如果係用M size以上嘅可以切半，
用廚房紙索乾水後，
用鹽 胡椒粉醃味  備用。

整薯蓉嘅程序同平時無咩分別，
薯仔去皮切片，
放入滾水裏，加鹽調味。
煮到薯仔腍晒，隔水。

同平時唔同嘅係，
牛油同牛奶唔好直接放落熱薯仔度。
係乾淨嘅小煲內用中火溶牛油，
溶晒後 繼續煲，記住要望實佢因為好易燶!!
間中搖下個煲，
到啲泡泡變得細密應該就可以啦。
即刻離火，倒入牛奶降溫。
底部見到啲啡啡地嘅牛油焦唔使怕，
佢哋就係精華啦
有關brown butter嘅info可以參考

跟住可以放入薯仔壓爛，
加鹽同胡椒粉調味。
備用。


之後準備白汁，(海鮮最後先整)
洋蔥切粒, 唔駛太細， 炒熟。
喺小煲內溶牛油，
轉慢火加麵粉拌勻到一舊粉團咁，
加入牛奶，繼續以慢火邊攪邊煮，
直到攪勻變成比正常白汁杰啲嘅狀態。
加鹽同胡椒粉調味。

哩個時候可以準備海鮮啦，
其實好簡單，
熱煎pan落少許橄欖油，
將三文魚 比目魚  帶子  蝦煮至個面熟咗之後落白酒，
待酒精揮發後，加入煮好嘅洋蔥同白汁一齊煮。

將所有嘢撈勻之後就可以放入焗盤，
(記住唔好煮太耐因為會再焗)
鋪上薯蓉，用叉畫好花紋，
放入焗爐，焗至薯蓉表面金黃色。

搞掂




XXX

薑蔥鮑魚麵

就嚟新年梗係要食返啲有新年feel嘅嘢，
例如清咗啲上年拜年收到嘅鮑魚麵:o)
weekend嘅下午就最啱係屋企煮下飯仔
與其出街食4x蚊一個餐不如係屋企煮個麵
今日唔想咁求其就開咗罐罐頭鮑魚撈麵，
健康好味又唔使同人迫！

材料:
罐頭鮑魚 (呢度用咗韓國鮑汁鮑魚13頭)
鮑魚麵
薑蓉
乾蔥 (切條)
蔥 (切粒)
生抽
蒜片

先用油輕輕將蒜片炸至金黃，備用
薑蓉 乾蔥 蔥，依次序用蒜油爆香，加少許生抽調味。
記得炸蒜片嘅時候要望實佢，一變金黃色就即刻拎出嚟
唔係就會變苦。

鮑魚連罐頭內嘅鮑汁以慢火翻熱
煮好麵後，放上薑蔥同鮑魚，淋上鮑汁，最後灑上炸蒜片
搞掂食得！


XXX